Президент Сооронбай Жээнбеков бүгүн, 30-августта Бишкек шаарында Улуттук коопсуздук мамлекеттик комитетинин кызматкерлери үчүн курулган жаңы турак үйдүн ачылыш аземине катышып, батирлеринин ачкычтарын тапшырды. Бул тууралуу мамлекет башчынын басма соз кызматы билдирет.

Президент Улуттук коопсуздук кызматына дайыма эң жогорку талаптар коюлуп келгенин белгиледи.

«Эл аралык терроризмге, уюшкан кылмыштуулукка, мыйзамсыз миграцияга, баңгизат трафигине, диний экстремизмге, улутчулдукка жана регионализмге каршы күрөш — силердин негизги милдетиңер. Бул багыттагы иш-аракеттерди күчөтүп, ар дайым жаңы чакырыктарга жана коркунучтарга даяр болуш керек», — деп белгиледи Сооронбай Жээнбеков.

Сооронбай Жээнбеков Куралдуу Күчтөрдүн аскер кызматчыларына жана укук коргоо органдарынын кызматкерлерине социалдык жактан колдоо көрсөтүү уланып жатканын белгиледи. Быйыл жалпысынан 216 батирлүү 4 үй курулуп бүттү. Жылдын аягына чейин 1245 батирлүү 21 үйдүн курулушун аяктоо пландаштырылууда. Ал үйлөр Бишкек шаарында, Баткен, Талас, Жалал-Абад жана башка облустарда курулуп жатат. Бүгүн 81 үй-бүлө квартиралуу болууда. Күч түзүмдөрүнүн кызматкерлерине көрсөтүлгөн колдоо, социалдык кепилдикке алуунун деңгээли дагы да жогорулайт.

Президент жаңы салынган үйдүн батирлерин карап чыгып, дагы бир жолу УКМК кызматкерлерин Эгемендүүлүк күнү жана жаңы конушу менен куттуктап, чың ден-соолук, узун өмүр, иштерине ийгиликтерди жана Мекен үчүн каармандык менен кызмат кыла беришин каалады жана ошондой эле балдар аянтчасын куруу үчүн 300 миң сомдук сертификат тапшырды.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз. Ctrl+Enter.