Кыргыз Республикасынын Министрлер Кабинетинин Төрагасы – Президенттин Администрациясынын Жетекчиси Адылбек Касымалиев Талас облусунун түзүлгөндүгүнүн 82 жылдыгына арналган салтанаттуу иш-чараларга катышты. Аймактын тургундарына кайрылуусунда Министрлер Кабинетинин Төрагасы облустун тарыхый маанисин белгилеп, Талас ар дайым ынтымактын, тынчтыктын жана жакшы коңшулуктун мекени болгонун, ар түрдүү элдердин жана маданияттардын өкүлдөрүнө урмат көрсөтүү салттары ушул жерде калыптанганын баса белгиледи.

«Кыргыз эли байыртадан бери эр жүрөк жана баатыр эл. Талас – Манастын, Чолпонбай Түлөбердиевдин жана Чыңгыз Айтматовдун жери. Бул – Кыргызстанды эрдиги, таланты жана эмгеги менен даңктаган көрүнүктүү инсандарды тарбиялаган ыйык жер», – деп белгиледи ал жана облуска мындан ары да өнүгүү, бакубатчылык жана гүлдөп-өнүгүү каалады.

Министрлер Кабинетинин Төрагасы акыркы жылдары Кыргыз Республикасынын Президентинин колдоосу менен Талас облусунда социалдык, инфраструктуралык жана экономикалык чөйрөдө ири долбоорлор ишке ашырылып жатканын белгиледи.

Бир катар объектилер Кыргыз Республикасынын Эгемендүүлүгүнүн 35 жылдыгына карата быйылкы жылы пайдаланууга берилет. Талас районунда «Манас Ордо» тарыхый-маданий комплекси толук кайра курулууда. Айтматов районунда «Айтматов Ааламы» маданий-мемориалдык комплексин куруу боюнча курулуш иштери жүрүп жатат. Ошондой эле Суусамыр – Талас – Тараз эл аралык автомобиль жолун реконструкциялоонун стратегиялык мааниси жана курулган «Бала-Саруу» чакан ГЭСи өзгөчө белгиленди.

Мындан тышкары, Министрлер Кабинетинин Төрагасы быйылкы жылдын 11-12-сентябрында Талас шаарында өтүүчү Кыргыз Республикасынын Эгемендүүлүгүнүн 35 жылдыгына арналган майрамдык иш-чараларды уюштуруу жана өткөрүү боюнча жыйын өткөрдү.

Жыйындын жыйынтыгында мамлекеттик жана жергиликтүү бийлик органдарына майрамды жогорку деңгээлде уюштуруу жана өткөрүү маселелери боюнча бир катар тапшырмалар берилди.

Источник информации gov.kg

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз. Ctrl+Enter.