Россиялык ырчы Женя Отрадная “Дарак ыры” тасмасынан бир ырды орусчага которуп ырдап чыкты. Ырчы тасмадагы Бегимайдын үнүн орусчалаган. Бул тууралуу тасманын сценаристи Айбек Дайырбеков билдирди.

Анын айтымында, Бегимайдын образы ырчыга таасир берип, бир ырын ырдап чыгайынчы деп сураган. Сүйлөшүүлөрдөн кийин, “Бегимайдын ырын” орусчага которуп, клип тартышты.

“Нурчолпондун варианты өзүнчө бир керемет эле, бул вариант дагы мага жакты. Романстарга окшоп, өзгөчө болуптур. Жакында ырчынын официалдуу каналынан жана телеканалдардан клипти толугу менен көрөбүз”, – деп Дайырбеков билдирди.

Буга чейин эч бир россиялык ырчы кыргыз ырларын которуп ырдаган эмес. Ырдын обонун композитор Жолдошбек Апасовду жазган. Орусча текстин Константин Арсенев жазды. Анын жазган ырларын Г.Лепс, К.Орбакайте, А.Варум, В.Леонтьев, Л.Агутин, Т.Овсиенко, Ф.Киркоров, Н.Басков, Алсу, гр.Любэ, Иванушки Интернешнл жана башка көптөгөн ырчылар аткарып жүрүшөт.

Кинонун ичиндеги дагы бир ырды башка россиялык ырчылар сурап жатышат. Учурда сүйлөшүүлөр жүрүп жатат.

Эгер ката тапсаңыз, сураныч, катаны белгилеп туруп, Ctrl+Enter баскычын басыңыз. Ctrl+Enter.